Stadig aukande interesse for landbruksfag i vidaregåande skule

Den positive trenden med aukande interesse for landbruksfag på vidaregåande skule held fram. For tredje år på rad er det ei markant auke i talet på søkjarar som har programfaget naturbruk som sitt fyrsteval. I følgje Utdanningsdirektoratet har naturbruk den prosentvis største auken med 11 prosent frå 2016 til 2017, samanlikna med alle andre programfag i vidaregåande skule. I fjor var auken på 15 prosent. 

– Dette er svært gode nyheiter. Det er viktig å halde trykket oppe for å få elevar til å velje yrkesfag generelt, men også særleg at ungdom ser betydinga av å velje naturbruk. Auka interesse for landbruksrelaterte fag på vidaregåande nivå er med på å leggje eit godt grunnlag for rekrutteringa til næringa framover, og at landbruksnæringa kan få den kompetansen som trengs, seier landbruks- og matminister Jon Georg Dale.

• Les meir om Søkere til videregående opplæring 2017-18 hjå Utdanningsdirektoratet